Член 1. Содржина на аранжманот
Организаторот на патувањето гарантира реализација на аранжманот според описот во програмата. Содржината на аранжманот се остварува во потполност и на опишаниот начин, освен ако тоа го спречи виша сила што не можела да се предвиди. Како виша сила се сметаат на пример војна, терористички акции, епидемии, штрајк, елементарни непогоди и сообраќајни или технички проблеми во превозот.
Член 2. Пријава-договор и уплата
Пријава-договор за патување се склучува до пополнување на местата, со уплата на аконтација на цената назначена во секоја поединечна програма. Пријави се примаат во агенцијата и во другите агенции овластени за продажба на нејзините програми (субагенти).
При пријавувањето купувачот уплаќа аванс од 30 проценти од вредноста на аранжманот, доколку програмата не наведува поинаку. Остатокот се плаќа по потврдата на резервацијата од службата за резервации, најдоцна 15 дена пред реализацијата на аранжманот или во рокот наведен во самиот аранжман.
Ако патникот не ја изврши доплатата до тој рок, организаторот смета дека патникот се откажува од аранжманот и ги наплатува отказните трошоци според член 6, доколку програмата не наведува поинаку.
При пријавувањето патникот потпишува пријава-договор со изјава дека е запознаен со програмата и со Општите услови на патување и дека во целост ги прифаќа. Така Општите услови стануваат правна обврска за организаторот и за патникот.
Член 3. Цена на аранжманот
Цените се објавуваат во денари или во евра, со обврска за плаќање во денарска противвредност според курсот на девизниот пазар што го објавува организаторот. Секое барање за дополнителни услуги значи дополнително плаќање.
Организаторот го задржува правото да ја промени цената ако се променат цените на хотелските, превозните и другите услуги или девизните курсеви на пазарот. За зголемување до 10 проценти не е потребна согласност на купувачот, а тоа се пресметува на остатокот од уплатата. При зголемување поголемо од 10 проценти купувачот има право да го раскине договорот без обврска да ја надомести штетата од отказот.
Ако патникот во рок од два дена од приемот на известувањето писмено не го извести организаторот дека се откажува од договорот, се смета дека ја прифатил новата цена. Дополнително објавените намалувања на цените, на пример специјални понуди или попусти од типот last minute, не се однесуваат на веќе склучените договори и не се основа за приговор или рекламација кон организаторот.
Член 4. Категоризација и опис на услугите
Хотелите и апартманите се опишани според официјалната категоризација во времето на издавањето на каталогот. Квалитетот на услугите го стандардизираат локалните туристички власти. Стандардите на сместување и услуги се различни по дестинации и не се споредуваат.
Организаторот не презема одговорност за усмена или писмена информација што не е во согласност со описот на услугите во понудената програма.
Член 5. Измени во програмата и отказ од страна на организаторот
Организаторот има право да ја измени програмата, во времетраењето или содржината, или целосно да ја откаже, во случај на виша сила или вонредни околности што не можел да ги предвиди, избегне или отстрани. Учесникот има право на рефундација на износот за нереализираните услуги. По договор со организаторот, веќе уплатениот износ може да се искористи за друга програма од неговата понуда.
Во ретки случаи кога нема можност за сместување во резервираниот објект, поради технички причини или презаказување (overbooking) од хотелиерот, организаторот ќе го смести патникот според можностите во тој момент, во објект од иста или од повисока категорија, без надомест.
Организаторот го задржува правото да го одложи или откаже аранжманот ако нема доволно пријавени патници според предвидениот минимум. Должен е да ги извести сите купувачи за отказот најмалку 5 дена пред почетокот на реализацијата и да им ги врати уплатените средства во целост, најдоцна во рок од 8 дена од денот на откажувањето.
Член 6. Право на патникот да се откаже од патувањето
Патникот може во секој момент да се откаже од патувањето, во писмена форма. Датумот на писмениот отказ е основа за пресметка и наплата на отказните трошоци, кои се исказуваат како процент од основната цена на аранжманот, доколку програмата не определува поинаку. Основната скала е наведена во списокот на крајот од овој член.
За бродски крстарења важи посебна скала: од 120 до 91 дена пред патувањето се наплатува 5 проценти, од 90 до 45 дена 15 проценти, од 44 до 29 дена 30 проценти, од 28 до 15 дена 50 проценти, од 14 до 7 дена 80 проценти, од 6 до 3 дена 95 проценти, а од 3 до 0 дена или во текот на патувањето 100 проценти.
За програми од понудата на интерконтинентални патувања важи посебна скала: од 60 до 45 дена пред патувањето се наплатува 5 проценти, од 44 до 35 дена 40 проценти, од 34 до 30 дена 60 проценти, од 29 до 20 дена 70 проценти, од 19 до 15 дена 90 проценти, а од 14 до 0 дена или во текот на патувањето 100 проценти.
За ученички екскурзии, настава во природа и студентски патувања, ако комплетниот договор го откажува училиштето или факултетот за сите патници, важи посебна скала: за отказ до 120 дена пред патувањето се наплатува 5 проценти, од 119 до 90 дена 20 проценти, од 89 до 60 дена 50 проценти, од 59 до 45 дена 80 проценти, а од 44 до 0 дена или во текот на патувањето 100 проценти.
Ако се откаже аранжман платен по попуст или од специјалните промоции на агенцијата (first minute, early booking и слично), каде што цените со попуст важат само ако до датумот на важност на попустот се уплати 30 или 50 проценти од вкупниот износ, уплатениот износ не се враќа и не може да се искористи за друг тип на аранжман. За аранжман платен по редовна цена важат условите за отказ од описот на аранжманот и од основната скала.
Ако се променат цените со објавување на нов ценовник, цената на веќе договорените услуги не се менува. Ако се откаже веќе потврдена резервација на упит, организаторот наплатува отказни трошоци во висина на уплатената аконтација.
Ако патникот навреме го откаже патувањето, организаторот има право на манипулативен трошок од 10 евра по пријава-договор. Ист трошок од 10 евра по пријава-договор се наплатува ако патникот го менува терминот на поаѓање на истиот аранжман најмалку 15 дена пред претходно потврденото поаѓање, доколку промената е можна.
Ако патникот се откажува пред почетокот на патувањето од причини што не можел да ги предвиди, избегне или отстрани, како болест, повреда или смрт во потесното семејство или елементарна непогода, и тоа го потврди со важечка потврда од надлежните органи, не ги плаќа отказните трошоци според скалата. Тој плаќа само реални трошоци од откажувањето, кои организаторот мора да ги плати на крајниот давател на услугата, без право на рефундација. За такви непредвидливи причини препорачуваме осигурување од ризик на откажување на договорено туристичко патување кај осигурителна компанија. Полисата може да се договори и да се уплати на продажното место, истовремено со уплатата на аранжманот.
Ако патникот се откажува по почетокот на патувањето поради виша сила, како воени настани, терористички акти, елементарни непогоди или сообраќајни незгоди, организаторот не одговара и нема обврска за поврат на средства за нереализираните услуги, освен ако крајниот давател на услугите прифати и изврши рефундација.
- од 60 до 45 дена пред патувањето: 5 проценти
- од 44 до 30 дена пред патувањето: 10 проценти
- од 29 до 20 дена пред патувањето: 20 проценти
- од 19 до 15 дена пред патувањето: 40 проценти
- од 14 до 10 дена пред патувањето: 80 проценти
- од 9 до 6 дена пред патувањето: 90 проценти
- од 5 до 0 дена пред патувањето или во текот на патувањето: 100 проценти
Член 7. Обврски и права на организаторот на патувањето
Организаторот е должен да се грижи за реализацијата на услугите и за изборот на извршителите на услугите со внимание на добар организатор, како и за интересите на патниците според професионалните принципи во туризмот. Должен е на патникот да му ги овозможи сите услуги наведени во програмата на поединечниот аранжман.
Организаторот склучува договори само со сообраќајни претпријатија чии превозни средства ги исполнуваат условите од прописите за јавен патен сообраќај, со угостителски субјекти што имаат лиценца и категорија на објектот, и со лиценцирани туристички водичи и придружници. Одобрението или лиценцата за работа ги издава, а работењето го контролира надлежниот орган на државата во која се регистрирани.
Организаторот не одговара за штета што настанала поради грешки во работењето на сообраќајните претпријатија, угостителските субјекти, водичите и придружниците кои не можел да ги предвиди или избегне, ниту за штета поради промени во програмата или неизвршени услуги под дејство на виша сила. Исклучена е и одговорноста за доцнење на превозните средства за кои превозникот не одговара според позитивните прописи и меѓународните конвенции.
Организаторот не прифаќа одговорност ако дипломатско-конзуларно претставништво ја одбие влезната виза или задоцни со нејзиното издавање, или ако емиграционо одделение на странска земја не одобри влез на одреден патник. Не одговара ни ако патникот го изгубил патниот документ, ако документот е неисправен, со изминат рок или со недоволен период на важност за влез во земјата на патување. Во тие случаи патникот самиот ги плаќа дополнителните трошоци.
Во сите наведени случаи организаторот ќе обезбеди соодветна помош на засегнатиот корисник за безбедно враќање од патувањето или за остварување на побарувања од давателот на услугите, но ќе ги наплати и трошоците што ќе произлезат од тие дополнителни услуги.
Член 8. Обврски и права на патникот
Патникот е должен да се грижи тој лично, неговите документи и предмети да ги исполнуваат условите од граничните, царинските, здравствените и другите прописи на неговата земја и на земјата во која патува. Должен е да го почитува куќниот ред во угостителските и хотелските објекти и во превозните средства, и со добра намера да соработува со претставникот или придружникот на организаторот и со извршителите на услугите. За штета што ќе ја предизвика, патникот одговара пред организаторот. Патниците што го нарушуваат редот во објектите или во возилото можат да бидат отстранети од аранжманот.
Патникот е должен да поседува важечки пасош и да побара информација кај надлежните служби или да се информира кај организаторот дали за земјата во која патува, или за земјите низ кои се патува во транзит, е потребна виза, за да се обезбеди навреме. Исто така е должен да се информира за девизните и царинските прописи во својата земја и во земјите во кои патува.
При патување со авион патникот мора да ја провери својата резервација за лет во агенцијата најдоцна 72 часа пред летот. Патникот ги чува и лично одговара за сите свои документи, парични средства и личен багаж за сето време на патувањето.
Член 9. Превоз со авион
Превозот на патниците со авион е уреден со меѓународните правила на авионскиот сообраќај и со правилата на авиокомпанијата што ја ангажира организаторот. За сите авионски патувања на редовни линии се подразбира превоз на патници во економска класа.
Ако авиокомпанијата го промени предвиденото време на полетување или авионот задоцни, на една или повеќе редовни линии или чартер-летови во текот на патувањето, организаторот не ја сноси одговорноста за последиците. Се применуваат важечките прописи и узанси од областа на авио-сообраќајот.
Ако личните податоци дадени на организаторот не се совпаѓаат со податоците од пасошот, на пример при давање скратени или непотполни имиња, картата може да се прогласи за нерегуларна или неважечка и да треба да се издадат нови карти. Тој трошок е на товар на патникот. Ваквите грешки можат да предизвикаат сериозни проблеми во текот на патувањето и се лична одговорност на патникот.
Патникот е одговорен за својата авионска карта од моментот кога ќе ја добие од водичот на аеродромот или од службеник на агенцијата. Не постои можност за издавање дупликат на карта, ниту на бординг карта. Патникот во целост ги носи последиците од губењето на картата во текот на патувањето.
Член 9-а. Превоз со автобус и автобуски трансфери
Превозот со автобус и автобуските трансфери се вршат со стандардни туристички автобуси, според прописите и критериумите што важат во земјата во која е регистриран превозникот што го ангажира организаторот.
По правило не постои однапред определен распоред на седишта, ниту утврден начин за промена на седиштата по денови во текот на патувањето. Местата во автобусот се доделуваат по редослед на датумот на пријавување на патникот. Исклучок се одредени автобуски патувања, за кои програмата содржи посебна одредба.
Организаторот не одговара за доцнење на автобусот поради временските услови, вонредни услови во сообраќајот, прекумерни задржувања на границите, технички дефект или слично. Одредбите за патувања со брод или железница се наведени во програмите што предвидуваат такви превозни средства.
Член 10. Багаж
Патникот има право на бесплатен превоз на багаж до 15 кг на чартер летовите и до 20 кг на редовните авионски линии, и едно парче рачен багаж, доколку програмата не наведува поинаку. При автобуски слободен или чартер превоз дозволен е бесплатен багаж од една патна торба (до 20 кг) по патник и едно парче рачен багаж. За секој килограм багаж или патна торба над дозволеното, превозникот има право да наплати дополнителни трошоци по килограм или парче или да не дозволи превоз, зависно од багажниот простор на возилото.
При летови со ниско-буџетни авиокомпании бесплатниот багаж се определува според правилата на авиокомпанијата со која се реализира летот. Деца до 2 години на авионскиот превоз и деца што не плаќаат билет во автобусот имаат право на бесплатен багаж според меѓународните правила.
Како багаж не се дозволува внесување на трговска стока, храна, пијалоци, лекови, наркотици, хемиски и други запаливи средства, оружје, животни, растенија, амбалажи и слични предмети. При внесување и изнесување на багажот од возилото патникот одговара со лично присуство.
За багажот за време на аранжманот се грижи самиот патник. Затоа препорачуваме пред патувањето да се направи полиса за патничко осигурување со осигурување на багаж кај осигурителна компанија, која може да се уплати во агенцијата. Организаторот не одговара за уништен или изгубен багаж, ниту за изгубен багаж или драгоцености за време на престојот во хотелот. Препорачуваме закуп на сеф на хотелската рецепција.
Член 11. Здравствени прописи и заштита
Патникот е должен да се информира кај надлежната здравствена институција и да ги почитува здравствените прописи за патување во одредена земја, на пример потребата од вакцина или здравствен документ. При болест или незгода во текот на аранжманот, трошоците за лекување или за лекарски интервенции ги плаќа патникот.
Затоа препорачуваме пред патувањето да се направи полиса за патничко осигурување кај осигурителна компанија, која може да се уплати во агенцијата.
Член 12. Сместување во соби и апартмани
Ако патникот не договорил соба или апартман со посебни карактеристики, ќе прифати која било официјално регистрирана соба или апартман во договорениот објект, опишана во каталогот и ценовникот. Организаторот ќе се обиде да одговори на дополнителните барања на патникот (удобност, ориентација на собата, кат и слично), но не може да гарантира дека ќе бидат исполнети.
Вообичаено, сместувањето во собите е од 14:00 часот, а напуштањето на собите е до 10:00 часот, доколку куќниот ред не наведува поинаку.
Член 12-а. Индивидуални патувања
Индивидуално патување е комбинација од две или повеќе услуги што организаторот ги обезбедува според барањето на патникот. Вообичаено вклучува сместување за одредени датуми и/или превоз, локален сервис и слично. Организаторот не го нуди како редовна групна програма, туку се организира само за потребите на патникот.
За индивидуални резервации патникот уплаќа депозит на име трошоци за резервација. Ако патникот ја прифати резервацијата, депозитот се пресметува во цената на патувањето. Ако организаторот не ја потврди резервацијата, депозитот му се враќа на патникот во целост. Одредбите од член 6 не се применуваат кај индивидуалните резервации и аранжмани.
Патникот може да го откаже договорот за индивидуално патување и по извршена целосна уплата, со писмено известување до организаторот. Датумот на писмениот отказ е основа за пресметка на надоместокот на организаторот, изразен како процент од вкупната цена на бараното патување. Скалата е наведена во списокот на крајот од овој член.
Организаторот, освен во случај на своја немарност, не одговара за недостатоци и за материјална или телесна штета при индивидуални патувања, бидејќи е само посредник меѓу патникот и крајните даватели на услуги, на пример за сместување, превоз, влезници за спортски манифестации, излети или рент-а-кар. По добивањето доказ за поединечно договорената услуга, договорните услови важат исклучиво меѓу патникот и секој краен давател на услугата.
- од 120 до 91 дена пред патувањето: 10 проценти
- од 90 до 45 дена пред патувањето: 20 проценти
- од 44 до 29 дена пред патувањето: 30 проценти
- од 28 до 15 дена пред патувањето: 50 проценти
- од 14 до 7 дена пред патувањето: 80 проценти
- од 6 до 3 дена пред патувањето: 95 проценти
- од 3 до 0 дена пред патувањето или во текот на патувањето: 100 проценти
Член 13. Решавање на приговори
Ако услугите се извршени непотполно или неквалитетно, патникот има право на соодветно обештетување, само ако достави писмен приговор до организаторот. Секој патник носител (потписник) на договорот има право на приговор врз основа на неизвршена договорена услуга. Организаторот нема да прима групни приговори што ги поднесуваат повеќе носители на договори врз основа на еден приговор.
Постапката за поднесување приговор е следна:
- Веднаш на самото место патникот ја пријавува неадекватната услуга кај претставникот на организаторот, а ако него го нема, кај извршителот на услугите. Патникот соработува со добра намера за да се отстранат причините за приговорот. Ако на самото место не го прифати понуденото решение што одговара на уплатената услуга, организаторот нема да ја уважи дополнителната рекламација.
- Ако причината за рекламацијата не се отстрани, патникот со претставникот составува писмена потврда (записник).
- Најдоцна 8 дена по завршувањето на аранжманот патникот поднесува писмен приговор на продажното место каде го уплатил аранжманот, со писмената потврда потпишана од претставникот и со сметките за дополнителни трошоци. Организаторот ги прима во постапка само потполно документираните приговори поднесени во тој рок од 8 дена.
- Организаторот донесува писмено решение во рок од 14 дена од приемот на приговорот на продажното место. Рокот може да го одложи за да ги комплетира информациите и да ги провери наводите кај извршителите на услугите. Решава само за рекламации чии причини не можеле да се отстранат во местото на одмор.
- Додека организаторот не донесе решение, патникот се откажува од посредување на други лица, од судска постапка и од давање информации во јавните медиуми. Непочитувањето е основ приговорот да не се прифати, постапката да се прекине и организаторот да поднесе тужба за надомест на штетата поради нарушен углед во јавноста.
- Највисокиот надомест по приговор може да достигне до износот на рекламираниот дел од услугите. Тој не може да ги вклучува веќе искористените услуги, ниту вкупниот износ на аранжманот. Со тоа е исклучено правото на купувачот на надомест на „идеална штета“.
Член 14. Надлежност на судот
Купувачот на услугите од одредена програма има право на рекламација кај организаторот, според член 13. Ако купувачот не е задоволен од решението на организаторот, има право да побара дополнителна арбитража и мислење од Судот на честа при надлежната комора или да се обрати до надлежниот суд во местото каде е седиштето на организаторот.
Напомена за оваа верзија
Ова е скратена демо верзија на општите услови за патување, подготвена за приказ на оваа веб-страница. Правно обврзувачки е целосниот текст на општите услови, кои патникот ги прифаќа со потпишување на пријавата-договор. Во оригиналот како потписник е наведена Стопанската комора за туризам на Македонија (СКТМ).